Dili, Timor-Leste
Jape Group anunsia ona planu ba Areia Suites by Jape Group Hotel, projetu foun ida ho andar hitu ba apartamentu ho servisu hanesan otel no apartamentu rezidensial, ne’ebe sei harii iha area Timor Plaza Dili Central.
Areia Suites dezenha hanesan aumentu estratejiku ida ba area Timor Plaza, no sei responde ba demanda ne’ebe sa’e daudaun ba akomodasaun ho kualidade aas ba tempu mediu to’o naruk, ba ema ne’ebe halo viajen ba negosiu, ema estranjeiru sira no profisional rejional sira ne’ebe servisu iha Dili. Projetu ne’e hanoin hanesan modelu otel no apartamentu ida ne’ebe fleksivel, ne’ebe permite unidade sira atu muda entre uzu otel ba tempu badak no tempu mediu, no aluga ba hela ba tempu naruk, tuir demanda merkadu nian ne’ebe muda daudaun.
Tuir planu, projetu ne’e sei iha area konstrusaun bruta maizumenus 4,200 to’o 4,500 metru kuadradu, ho unidade 48 no kama 60 iha andar hitu. Projetu ne’e planeia atu remata iha trimestre dahaat tinan 2027, no Divizaun Ospitalidade Timor Plaza Hotel mak sei opera.
Areia Suites sei kombina akomodasaun estilu apartamentu ne’ebe fornese servisu, no mos opsaun apartamentu rezidensial. Projetu ne’e sei iha fasilidade ho nivel otel butik nian, inklui lobi no resesaun, restorante no kafe, sala reuniaun, servisu apoiu operasional no fasilidade ba bainaka sira. Tuir planu, andar sira iha okos sei funsiona hanesan apartamentu ho servisu no mos akomodasaun ba bainaka otel nian bainhira otel nakonu, enkuantu andar sira iha leten sei oferese fatin hela estilu apartamentu ba tempu naruk.
Jape Group dehan katak projetu ne’e hatudu nia kompromisu kontinuu atu hametin infraestrutura urbana, komersial no otelaria iha Timor-Leste.
“Areia Suites dezenha ho hanoin ba fleksibilidade, kualidade no relevansia ba merkadu iha tempu naruk,” Alan Jape, Prezidente Jape Group nian, hateten.
“Tanba Dili kontinua dezenvolve hanesan sentru ba negosiu, governu, dezenvolvimentu no atividade rejional sira, iha nesesidade klaru ba akomodasaun ne’ebe bele serve vizitante sira ne’ebe hela ba tempu badak no mos rezidente sira ne’ebe hela ba tempu naruk. Areia Suites sei aumenta tan opsaun seluk ba area Timor Plaza – Dili Central no apoia area ne’e nia evolusaun ne’ebe kontinua.”
Projetu ne’e dezenvolve tuir objetivu prinsipal sira, inklui fleksibilidade operasional, opsaun akomodasaun ne’ebe barak liu, efisiensia iha dezenhu, entrega ho kualidade, no kapasidade atu responde ba tendensia merkadu nian iha futuru. Edifisiu ne’e mos sei integra ho area Timor Plaza ne’ebe luan liu, hodi apoia infraestrutura, servisu no asesu ne’ebe uza hamutuk.
Areia Suites husi Jape Group Hotel agora daudaun iha faze konseitu arkitetoniku no hadi’a liután dezenhu. Faze tuir mai sei foka ba finaliza kombinasaun tipu unidade, efisiensia ba dispozisaun espasu, artikulasaun fasada, planeamentu kustu no revizaun husi parte interesadu sira.